കാസര്‍കോട്: (www.kasargodvartha.com 09.12.2020) തെരഞ്ഞെടുപ്പില്‍ ബിജെപി നേട്ടമുണ്ടാക്കുന്നത് തടയാനുള്ള ഉത്തരവാദിത്തം യുഡിഎഫും എല്‍ഡിഎഫും ഏറ്റെടുക്കണമെന്ന് എസ് ഡി പി ഐ സംസ്ഥാന പ്രസിഡണ്ട് അബ്ദുല്‍ മജീദ് ഫൈസി ആവശ്യപ്പെട്ടു. കാസര്‍കോട് പ്രസ് ക്ലബ്ബില്‍ വാര്‍ത്താ സമ്മേളനത്തില്‍ സംസാരിക്കുകയായിരുന്നു അദ്ദേഹം.
കേരളത്തിലെവിടെയും ബിജെപിയെ പരാജയപ്പെടുത്താനുള്ള വോട് ബാങ്ക് ഇരുമുന്നണികള്‍ക്കുമുണ്ട്. അതവര്‍ ഉപയോഗപ്പെടുത്തുന്നില്ലെന്ന് മാത്രമല്ല, രഹസ്യധാരണയിലേര്‍പ്പെട്ട് ബിജെപിയെ വളര്‍ത്തുകയും ചെയ്യുന്നു. വര്‍ഗീയ ഫാസിസ്റ്റുകളോട് ധാരണയെന്നാണ് ഇരു മുന്നണികളും പരസ്പരം ആരോപിക്കുന്നത്.
കാസര്‍കോട് ജില്ലയിലെ മച്ചംപാടിയില്‍എസ്ഡിപിഐയെ തോല്‍പ്പിക്കാന്‍ മുസ്ലിം ലീഗ് ബിജെപിയുമായി ഉണ്ടാക്കിയ പരസ്യ സഹകരണം ആത്മഹത്യാപരമാണ്. ഇതിന് ലീഗ് വലിയ വില നല്‍കേണ്ടി വരും. ഫാസിസ്റ്റുകളോട് പരിമിതികളില്ലാത്ത പോരാട്ടംഎസ് ഡി പി ഐ തുടരും.
ഭരണപക്ഷത്തും പ്രതിപക്ഷത്തുമുള്ള നേതാക്കളുടെ തട്ടിപ്പുകളും വെട്ടിപ്പുകളും ദിനംപ്രതി പുറത്ത് വന്നു കൊണ്ടിരിക്കുകയാണ്. ആരോപണ വിധേയരായവര്‍ മാറി നിന്ന് അന്വേഷണത്തെ നേരിടുന്ന മര്യാദ കൈവെടിഞ്ഞ്എതിര്‍ പക്ഷത്തിന്റെ ന്യൂനതകളെ മറയാക്കി രക്ഷപ്പെടാനാണ് ശ്രമിക്കുന്നത്.
മഞ്ചേശ്വരം എംഎല്‍എ നൂറിലധികം കേസുകളില്‍ അറസ്റ്റിലായിട്ടും അദ്ദേഹത്തെ സംരക്ഷിക്കുന്ന ലീഗ് സംസ്ഥാന നേതൃത്വത്തിന് രാഷ്ട്രീയ ധാര്‍മ്മികതയെ കുറിച്ച് സംസാരിക്കാനുള്ള അര്‍ഹത നഷ്ടപ്പെട്ടു.
ഉയര്‍ന്ന നേതാക്കളുടെ തെറ്റായ സ്വഭാവം കണ്ടു പഠിച്ചവരാണ് താഴെക്കിടയിലുമുള്ളത്. അത്തരക്കാര്‍ ജനപ്രതിനിധികളായി വന്ന് പൊതു സമ്പത്ത് കൊള്ളയടിക്കുന്നത് തടയേണ്ട ബാധ്യത ഓരോ പൗരനുമുണ്ട്. ഈ ബോധ്യത്തോടെയാണ് സമ്മതിദാനാവകാശം ഉപയോഗിക്കേണ്ടത്.
പുതിയ നിയമനിര്‍മ്മാണങ്ങളിലൂടെ വംശീയമായ ചേരിതിരിവ് സൃഷ്ടിച്ചും, വിലക്കയറ്റത്തിലൂടെ ജനജീവിതം ദുസ്സഹമാക്കിയും രാജ്യത്തെ തകര്‍ച്ചയിലേക്ക് നയിച്ചു കൊണ്ടിരിക്കുന്ന ബിജെപിക്കും തിരഞ്ഞെടുപ്പിലൂടെ മറുപടിനല്‍കേണ്ടതുണ്ട്. വാര്‍ത്താ സമ്മേളനത്തില്‍ ജില്ലാ പ്രസിഡണ്ട് എന്‍ യു അബ്ദുല്‍ സലാം, ജനറല്‍ സെക്രടറി ഖാദര്‍ അറഫ എന്നിവര്‍ സംബന്ധിച്ചു.
Keywords: Kasaragod, News, Kerala, BJP, SDPI, Press meet, Local-Body-Election-2020, UDF, LDF,, Muslim-league, case, arrest, UDF and the LDF must take responsibility for preventing the BJP from winning the elections: Abdul Majeed Faisy
