മുന്നണികള്‍ ജനകീയ പ്രശ്‌നങ്ങള്‍ മറക്കുന്നു: എംഎന്‍ കാരശേരി

കാസര്‍കോട്:(www.kasargodvartha.com 04.04.2014) തിരഞ്ഞെടുപ്പില്‍ മുന്നണികള്‍ ജനകീയ പ്രശ്‌നങ്ങള്‍ മറക്കുകയും അടിസ്ഥാനരഹിതമായ പ്രശ്‌നങ്ങളുയര്‍ത്തി ജനങ്ങളെ സമീപിക്കുകയാന്നെും പ്രശസ്ത എഴുത്തുകാരന്‍ എംഎന്‍ കാരശേരി പറഞ്ഞു. കാസര്‍കോട് പ്രസ് ക്ലബ്ബില്‍ വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം.

തിരഞ്ഞെടുപ്പില്‍ യഥാര്‍ഥ രാഷ്ട്രീയപ്രശ്‌നങ്ങളില്‍ ശ്രദ്ധ തിരിക്കുകയാണ് ഇടതു-വലത് മുന്നണികളും ബി.ജെ.പിയും. ഭരണഘടനയനുസരിച്ച് സത്യപ്രതിജ്ഞ ചെയ്ത് അധികാരത്തിലെത്തുന്ന ജനപ്രതിനിധികള്‍ കോര്‍പറേറ്റുകളുടെ ദാസ്യന്മാരാകുന്ന സ്ഥിതിവിശേഷമാണുള്ളത്. ചങ്ങാത്ത മുതലാളിത്തമെന്ന പുതിയ വ്യവസ്ഥിതി പോലും ഉടലെടുത്തുകഴിഞ്ഞു. ഓരോ മണ്ഡലത്തിലെും രാഷ്ട്രീയപ്രശ്‌നങ്ങള്‍ വ്യത്യസ്തമാണ്. എന്‍ഡോസള്‍ഫാന്‍ ദുരിതമനുവിക്കുന്ന കാസര്‍കോഡിന്റെ പ്രശ്‌നങ്ങള്‍ മറ്റു മണ്ഡലങ്ങളിലില്ല. വയനാട്ടിലെയും ന്യൂയോര്‍ക്കിലെയും ആവാസവ്യവസ്ഥ പരിഗണിക്കാതെയുള്ള വികസനം ജനങ്ങളുടെ ഉന്മൂലനാശത്തിനു മാത്രമേ വഴിയൊരുക്കുകയുള്ളു. പുഴയെയും പ്രകൃതിയെയും മണ്ണിനെയും സംരക്ഷിച്ചുകൊണ്ടുള്ള വികസനമാണ് ആംആദ്മി പാര്‍ട്ടി കാണുന്നത്.

ബാബ്‌റി മസ്ജിദ് തര്‍ക്കത്തിന്റെ മറവിലാണ് ഇന്ത്യയില്‍ ഉദാരവല്‍ക്കരണ-ആഗോളവല്‍കരണ നയങ്ങള്‍ സജീവമായത്. 1949ല്‍ ജവഹര്‍ലാല്‍ നെഹ്‌റു അടച്ചുപൂട്ടിയ മസ്ജിദ് രാജീവ് ഗാന്ധിയാണ് ചില താല്‍പര്യങ്ങള്‍ക്കുവേണ്ടി തുറന്നുകൊടുത്തത്. 92ല്‍ നരസിംഹറാവുവിന്റെ കാലത്ത് ഇത് തകര്‍ക്കപ്പെട്ടതോടെ രാജ്യത്തു സ്വകാര്യവല്‍ക്കരണവും ഉദാരവല്‍ക്കരണവും ആഗോളവല്‍ക്കരണവും സജീവമാവുകയായിരുന്നു. ഇത്തരം രാഷ്ട്രീയമുതലെടുപ്പുകള്‍ ജനങ്ങളുടെ അവകാശങ്ങളാണ് നഷ്ടമാക്കുന്നത്.