പൊസോട്ട് കാര്‍ വയലിലേക്ക് മറിഞ്ഞ് 5 പേര്‍ക്ക് പരിക്ക്

ഉപ്പള: ദേശീയ പാതയില്‍ പൊസോട്ട് കാര്‍ നിയന്ത്രണംവിട്ട് റോഡരികിലെ വയലിലേക്ക് മറിഞ്ഞ് അഞ്ച് പേര്‍ക്ക് പരിക്കേറ്റു. തിങ്കളാഴ്ച പുലര്‍ചെ 1.30 മണിയോടെ പൊസോട്ട് പെട്രോള്‍ പമ്പിന് 100 മീറ്റര്‍ അകലെ വളവിലാണ് അപകടമുണ്ടായത്.

കണ്ണൂരില്‍ നിന്ന് മംഗലാപുരത്തേക്ക് പോവുകയായിരുന്ന കെ.എല്‍. 13 ബി-8737 നമ്പര്‍ വാഗണര്‍ കാറാണ് നിയന്ത്രണംവിട്ട് വയലിലേക്ക് മറിഞ്ഞത്. കാറിലുണ്ടായിരുന്ന അഞ്ച് പേരെ മംഗലാപുരത്തെ ഇന്‍ഡ്യാന ആശുപത്രിയില്‍ പ്രവേശിപ്പിച്ചു. പരിക്കേറ്റവര്‍ അത്യാഹിത വിഭാഗത്തില്‍ കഴിയുകയാണ്. ഇവര്‍ കണ്ണൂര്‍ സ്വദേശികളാണെന്നാണ് വിവരം.

രാത്രി വയലില്‍ നിന്ന് നിലവിളികേട്ട് മറ്റ് വാഹനങ്ങളിലെ യാത്രക്കാര്‍ അന്വേഷിച്ചപ്പോഴാണ് കാര്‍ മറിഞ്ഞുകിടക്കുന്നത് ശ്രദ്ധയില്‍പെട്ടത്. കാറിനകത്ത് കുടങ്ങിക്കിടന്ന യാത്രക്കാരെ നാട്ടുകാരാണ് ആശുപത്രിയില്‍ പ്രവേശിപ്പിച്ചത്. അപകടസ്ഥലത്തേക്ക് പോലീസും ആമ്പുലന്‍സും എത്താന്‍ വൈകിയതായി ആക്ഷേപമുണ്ട്. അപകടത്തെ കുറിച്ച് കൂടുതല്‍ അന്വേഷണം നടത്തിവരുന്നതായി മഞ്ചേശ്വരം എസ്.ഐ. ബിജുലാല്‍ പറഞ്ഞു.