ഗള്‍ഫുകാരന്റെ വീട്ടില്‍ നിന്നും 17 പവനും 1,35,000 രൂപയും കവര്‍ന്നു

ബദിയഡുക്ക:വാതില്‍ തകര്‍ത്ത് ഗള്‍ഫുകാരന്റെ വീട്ടില്‍ നിന്നും 17 പവന്റെ സ്വര്‍ണാഭരണങ്ങളും 1,35,000 രൂപയും കവര്‍ന്നു. മുണ്ട്യത്തടുക്ക ചേവയിലെ മുഹമ്മദിന്റെ വീടാണ് കൊള്ളയടിച്ചത്. മുഹമ്മദ് ഗള്‍ഫിലാണ്. ഭാര്യ താഹിറയും മക്കളുമാണ് ഇവിടെ താമസം. അലമാരയിലായിരുന്നു സ്വര്‍ണവും പണവും സൂക്ഷിച്ചിരുന്നത്. ഞായറാഴ്ച ഉച്ചയ്ക്ക് താഹിറ മക്കളേയും കൂട്ടി ധര്‍മത്തടുക്കയിലെ തറവാട്ടുവീട്ടില്‍ പോയിരുന്നു.

അയല്‍പക്കത്തു താമസിക്കുന്ന ഭര്‍തൃബന്ധുക്കള്‍ ഞായറാഴ്ച രാത്രി ഇവിടെ താമസിക്കാന്‍ എത്തിയപ്പോഴാണ് കവര്‍ച്ച ശ്രദ്ധയില്‍പെട്ടത്. മുന്‍വശത്തെ വാതില്‍ അകത്തുനിന്നും കുറ്റിയിട്ട നിലയിലായിരുന്നു. പിന്‍ഭാഗത്തെ വാതില്‍ തുറന്നുവെച്ച നിലയിലും കണ്ടെത്തി. അകത്തുകയറി നോക്കിയപ്പോഴാണ് അലമാരയിലെ സ്വര്‍ണവും പണവും കവര്‍ന്നത് ശ്രദ്ധയില്‍പെട്ടത്.

വിവരമറിഞ്ഞ് ബദിയഡുക്ക പോലീസ് സ്ഥലത്തെത്തി അന്വേഷണം ആരംഭിച്ചു. വിരലടയാള വിദഗ്ധരും പരിശോധന നടത്തി.