55,000 അമേരിക്കന്‍ ഡോളറുമായി കാസര്‍കോട് സ്വദേശി മംഗലാപുരത്ത് അറസ്റ്റില്‍

മംഗലാപുരം:ദുബൈയിലേക്കു കടത്താന്‍ ശ്രമിച്ച 55,000 അമേരിക്കന്‍ ഡോളറുമായി കാസര്‍കോട് സ്വദേശിയെ മംഗലാപുരം അന്താരാഷ്ട്ര വിമാനത്താവളത്തില്‍ ഡി.ആര്‍.ഐ. അധികൃതര്‍ അറസ്റ്റു ചെയ്തു. കുഡ്‌ലു സ്വദേശിയായ അബ്ദുല്‍ ബഷീര്‍ കടപ്പുറം മുഹമ്മദ്(30)എന്നയാളാണ് അറസ്റ്റിലായത്.

തിങ്കളാഴ്ച രാവിലെ 8.55 മണിക്കുള്ള എയര്‍ ഇന്ത്യ എക്‌സ്പ്രസില്‍ ദുബൈയിലേക്കു പോകാന്‍ വിമാനത്താവളത്തില്‍ എത്തിയതായിരുന്നു ഇയാള്‍. ട്രോളി ബാഗ് പരിശോധിച്ചപ്പോഴാണ് രേഖകളില്ലാതെ കടത്താന്‍ ശ്രമിച്ച ഡോളര്‍ കണ്ടെത്തിയത്. പിടികൂടിയ ഡോളറിന് 34 ലക്ഷം ഇന്ത്യന്‍ കറന്‍സി മൂല്യം കണക്കാക്കുന്നു. അബ്ദുല്‍ ബഷീറിനെ കൂടുതല്‍ ചോദ്യം ചെയ്തു വരികയാണ്.